صبحنا وصبح الملك لله

معرفش بقى في إيه اليومين دول، زي ما يكون ميه النيل مكونة من اكسجين وهيدروجين وإكتئاب الواحد بقى يصحى من النوم متعفرت ومتزرزر ومش طايق نغسه بقيت بصحى وقبل اي حاجة اقول صبحنا وصبح الملك لله أبص في المراية أشوف ال 1111 على جبهتي وكأني مولودة بيهم أدخل أغسل وشي وأتوضى وأخرج وأنا زي مانا ببقى بلبس عشان أروح شغلي وأنا جوايا شعور الشاه التي تساق إلى الذبح على رأي المرحومة ديانا ننزل وناخد التاكسي تيجي تحاسبة على مسافة متتخطاش 2 كيلو يقولك معدش في حاجة ب ... يا أبله في مرة رديت على واحد وقلتله لأ في بس إنت عيش على قدك ورحت رازعاله باب العربية وأنا نازلة.

أروح الشغل أحس كأني دخلت السيرك القومي وبحس إن لو محمود العسيلي عايز يعمل كليب لأغنية طراطير مش هيلاقي مودلز ولا اتموسفير أنسب من عندنا في الشغل ويبقى اللي في بالي بردو صبحنا وصبح الملك لله يارب عدي اليوم ده على خير.

الناس بجد بقت غريبة بقت دنيئة بشكل وبقى كل واحد لو طال يشرح زميلة هيعملها والزر بقى على ودنة وكأنهم يا جماة بيوزعوا مع المرتب خوازيق لزوم الزملاء وإنت وشطارتك في سرقه خوازيق الغير عشان تستعملها معاهم لعبه كده زي ما ريتشارد إنضرب بسهم عربي مسموم في فيلم الناصر صلاح الدين ووبقى فاضل اسمع " الحب حل محل الحقد في قلبك فهويتِ" وكأن الدنيا كلها تستعر بنيران الحقد المقدس يا بااااااااااااااااااااااااااااااااااااااااااي بجد بجد صبحنا وصبح الملك لله هو إيه يخويا الأيام العجيبة دي بقت حاجة تشل يخلصوا ال 8 ساعات بالطول والعرض ما بين بسلامته المدير وبسلامتهم الزميلات المعقدات والزملاء المتزرزرين ونيجي بقى لمواعيد الرجوع للبيت تبدأ وصله الرجالة اللي معندهاش لا ذوق ولا دم يوووووووه ما قلنا صبحنا وصبح الملك لله.

بنقف نستنى الاوتو بتاع الشركة تحس ان الرجالة بتبقى نفسها تدي اي ست بالكوع وتشبط وتطلع كان زمان " ladies First" بس باين المناهج إتغيرت وأنا اللي ملحقتش الكتب الجديدة ونسيت أقول إن نفس الحوار ده بيحصل الصبح بردو مانا بعد التاكسي بركب الأوتو والموقف بعينه بغباوته بشكله العكر بيحصل قدام الأسانسير يادي النيلة مش هبطل الإستطراد انا عارفة نفسي غاوية خروج عن النص نوصل للبيت وتلاقي نفسك خلاص فيصت وتعبان وحيحان وعامل يا ضنايا زي كان مربوط في ساقيه ونفسي أسمع أغنية الست شادية في فيلم شيء من الخوف يا عيني عالولد وأهديها لكل الأهل والأحباب والصحاب ونختمها بصبحنا وصبح الملك لله.